Atu moris santu laos buat ida-ne'ebe fasil atu hala'o. Dala ruma ita koko hadook an husi sala maibe nafatin monu ba sala liu husi tentasaun oi-oin. Tan ne'e mak ba ita ema hanaran an maksalak, katak la sees husi sala.
Mundu ohin loron ne'ebe globalizadu hakonu ona iha mundu ne'e ho buat aat oi-oin ne'ebe la fo valor ba ema nia moris. Teknolojia-dijital ne'ebe habelar iha sosiedade nia leet fo ona influensia makaas hodi transforma moralidade no etika iha sosiedade. La haree deit mos ba profisaun. Atu labarik, joven no to'o katuas no ferik sira influensia hotu. Tan ne'e mak iha tempu ida-ne'e hanaran, Era-Dijital.
Hahu husi tempu ne'e makhamosu pekadu oi-oin ne'ebe dala barak liu la fo vantajen ba nasaun no familia. Ezemplu: Kazu Seksual!
Bainhira seidauk tama teknolojia-dijital, dalabalun violensia seksual la mosu. Maibe haree ba realidade ne'ebe iha bainhira eziste ona teknolojia-dijital, komesa barak mak halo sala adulteiru hodi halo violasaun kontra feto no labarik-feto sira. Buat sira ne'e hotu mai husi mal utilizasaun ba teknolojia-dijital, liu-liu haree no download video no imajen aat sira husi Internet.
Nu'udar povu Maromak nian ita persiza atu hamriik metin no luta hasoru nafatin iha Era-Dijital ida-ne'e hodi tau Na'i nia prezensa sai nu'udar sentru iha ita-nia moris loron-loron.
