Buat barak los mak sei hein hela atu deskobre maibé nia kestaun mak ida ne'e iha sentidu no valor ba ida ne'ebé buka ka lae? Moris hanesan bain-bain iha situasaun ne'ebé totalmente la hanesan bain-bain. Oinsa mak bele ajusta ho moris ida bé la hanesan bain-bain ne'e? Nia konsikuensia, mak bainhira la biban ona atu hasoru hakarak eh lakohi tenki subar an iha maskara nia kotuk. Entaun realidade iha moris ne'e akontese katak la'os buat bain-bain ona ema barak mak labele sai sira-nia an lolos (auténriku). Sira presiza rona ida ne'e, hare ida ne'eba, imita ida ne'e, no la'o tuir modelu ida ne'eba. Ikus mai, sira la sai tiha ona sira-nia an ida ne'ebé *orijinal (inautentiku). Hakfodak liu tan, fenomena refere akontese ba kuaze ema hotu bé moris iha planeta mundu ida ne'e. Nune'e, oinsa ema sira ne'e bele moris? Ezatamente, ema sira ne'e moris duni maibé la hamoris sira-nia moris. Hanesan mate-isin ida ne'ebé halo finji moris hanesan kritura moris ida maibé la iha diferensia ho boneka tau pilla ka robot ida bé kontrola hela husi remotu. Dala ida tan, iha mundu atu moris ba ne'e susar. La'os tanba saúde ladiak ka falta domin ka ekonomia mak dezaraska hela, moris diak, riku eh kiak maibé liu fali buat sira ne'e hotu, mak sai estranjeiru rasik ba nia an. Durante nia moris, nia taka/uza máskara oin-oin atu halo ema hotu haksolok ho nia finjidu haksolok nian, halo ema hotu-hotu orgullu ho nia finjidu hatudu nia abilidade, halo ema hotu hamanasa ho oin-midar ho nia finjidu oin-midar, no halo ema hotu senti hetan atensaun no kuida ho nia finjidu laran-luak eh tulun-na'in. Buat sira ne'e hotu ita halo ba se los? Tanba sa ita presiza halo ba ema seluk? Tanba servi!? Tanba 'bem comun'/ema hotu nia diak!? Tanba Jesus/Maromak nia gloria!? Tanba manan prémiu iha lalehan!? Tanba hein ema nia hanoin mai ita!? Tanba atu kasu ita-nia sala!?
La hatene to'o bainhira los mak ema moris lahó taka maskara oin-oin ba nia oin. Sai realistiku liu fali fantazia idealistika . Sai onestu ba nia an rasik liu fali bosok ba nia an. Sai saida mak nia hakarak atu sai liu fali ema seluk nia hakarak nia atu sai. Lahó interven eh interupsaun husi ema seluk ba nia moris. Lahó ema seluk nia hateten 'ó presiza sai ide ne'e eh ida ne'eba mak diak. Presiza imita ida ne'e eh ida ne'eba mak los'. Ikus mai, kria iha ema nia an inautentiku iha ne'ebé mak ema labele tan ona iha abilidade atu deside rasik ba nia an basa hatene mak tuir-tuir sa mak ema seluk dehan ba nia atu la'o tuir. Labele tan ona, hamriik firme ba nia valor no prinsipiu rasik. Labele ona atu define nia an. Ba nia ema seluk nia hare sei defini nia an lolos liu fali ninia hare ba nia an. Nune'e, nia mentalidade la'os ona atu kria ba moris maibe hein moris ne'e mak kria ba nia. La hetan ona produtividade iha nia an tanba nia rasik sai produtu ida husi produsaun.
Ba ha'u-nia an rasik mos hanesan. To'o bainhira los mak ha'u sai kria-na'in ida? Bainhira los mak ha'u para atu kopia no paste ema seluk nia an ba ha'u-nia an rasik? To'o bainhira los mak ha'u bele hateten 'LAE' ba ema seluk nian no deklara 'LOS' ba ha'u nian? Ha'u la baruk ka tuir-tuir buat bain-bain ne'ebé ema hotu la'o tuir hanesan bain-bain? Saida los mak ha'u halo hodi deklara ha'u-nia ezistensia rasik?
