HA'U-NIA FILOZOFIA HANORIN

Ha'u fiar katak mestre ida, ba dala uluk, iha fiar bo'ot ba futuru. Hanesna kuda-na'in ida ne'ebe mak kuda ai-horis ne'ebe nia rasik sei la hare to'o rohan ai-oan ne'e sei sai bo'ot oinsa, ha'u hatene duni katak ha'u sei la hare fuan husi ha'u-nia servisu nu'udar mestre ida. Ha'u nia bolu mak atu kuda no hamoris ai-oan ne'ebe mak sei forma no sai bo'ot iha futuru.

Mestre ne'ebe diak hatene no komprende alunu sira, oinsa sira dezenvolve no aprende. Ha'u hatene katak alunu sira ne'e ho ativu bele konstrui no transforma rasik sira-nia konesimentu bazeia ba esperiensia uluk no daudaun ne'ebe mak sira hasoru. Ha'u hatene katak alunu sira hotu aprende ho dalan (meius) ne'ebe la hanesan. Ha'u fiar katak ida ne'e nu'udar ha'u-nia responsabilidade nu'udar mestre atu sai hanesan diagnostiku-na'in ba alunu sira nia interese, abilidade, no prioridade iha konesimentu. Ha'u mos tenki planu no fasilita esperiensia aprendizajen ne'ebe mak dezafia no husi estudante sira atu hanoin no sai bo'ot (krese). 

Ha'u fiar katak mestre ida tenki komprende motivasaun no efeitu husi alunu sira nia interasaun iha prosesu aprendizajen nia laran. Ha'u hakarak ha'u-nia alunu sira atinji nivel ne'ebe mak a'as, nune'e ha'u evita atu halo komparasaun entre sira no halo sira kompete ba malu. Ha'u hatene katak aprendizajen dala barak mosu liu husi interasaun sosial; tanba ne'e, ha'u estruturaliza aprendizajen atu alunu sira sai produtivu liu hodi servisu hamutuk no fo liman ba malu durante tempu aprendizjen iha aula laran. 

Mestre diak ida tenki hatene nia lisaun ho diak no oinsa atu tulun alunu sira tama klean ba llisaun nia laran. Ha'u hatene katak mestre tenki iha apresiasaun ne'ebe klean oinsa konesimentu ne'e kria iha dixiplina ida nia laran, oinsa ida ne'e organiza no oinsa ida ne'e relata ho dixiplina sira seluk. Ha'u uza ha'u-nia konesimentu husi dixiplina ne'e atu fo-sai ba ha'u-nia alunu sira iha modu hanoin ne'ebe kritiku, enkoraja sira atu analiza, aplika, sintetiza, no avalia ba buat hotu ne'ebe mak sira le no rona. Ha'u hadomi materia ne'ebe ha'u hanorin, no ha'u hatene oinsa atu halo sira sai moris liu tan ba ha'u-nia alunu sira. 

Mestre diak ida la bele hahu ka kontinua atu inspira aprendizajen molok sai uluk aprende-na'in ne'ebe diak. Mestre diak tenki aprende hela deit buat foun husi dixiplina ne'ebe nia hanorin. De facto, mestre diak ida sempre tulun atu kria konesimentu foun ida. Atu moris iha fiar ida hanesan ne'e, ha'u tenki ezamina nafatin ha'u-nia metodu hanorin sira no buka ida ne'ebe foun. Atu nafatin liga ba ha'u-nia alunu sira, sira-nia moris no eskola ne'ebe mak sira sei pratika sira-nia profeisaun, ha'u tenke sai estudante sosiedade nian no ho konsistensia transforma mundu ne'ebe mak alunu sira moris ba. Ha'u ho neon no laran tomak aprende husi ha'u-nia alunu sira hanesan sira aprende ho ha'u. 

Ha'u fiar mestre ida iha forsa bo'ot atu sai modelu ida. Ha'u konsiente katak obrigasaun ne'ebe ha'u iha maka 'hala'o ha'u-nia ko'alia' ho ha'u-nia alunu sira. Se ha'u husu sira atu tube nafatin iha valor no fiar sira nian, ha'u mos tenki halo nune'e. Ha'u espekta buat ne'ebe diak liu hotu --ba ha'u-nia an no ba ema seluk-- no, tanba ne'e, ha'u bain-bain hetan ida ne'ebe diak liu hotu. Ha'u koko atu trata ema hotu ho respeitu no dignu, no ha'u hein ha'u-nia alunu sira mos sei halo buat ne'e hanesan ha'u halo. 

Se'es husi hakerek 'ensino filosofia', ha'u prefere liu atu hanoin kona-ba aprendizajen no tulun ema seluk atu aprende liu fali atu hanorin deit. Ha'u fiar katak ita barak maka hanoin hodi defini katak 'hanorin' ne'e hanesan atu transmite deit informasaun, ne'ebe mak ha'u fiar katak ne'e hanesan deit ho inisiu hanorin nian no parte ki'ik-oan ida iha aprendizajen. Bainhira ida fo informasaun, ida ne'e fasil los atu hatur aprendizajen hanesan atu dekor deit informasaun. Ha'u dau-daun ne'e hahu atu komprende katak prezente bo'ot mestre ida nian maka aprende-na'in tulun aprende-na'in sira seluk sai motiva liu tan atu hanoin, no tuir mai iha iha hakarak atu aprende liu tan. 

Ha'u fiar iha bi'it husi hahusuk no kestiona estratejia sira atu provoka hanoin. Ha'u nafatin koko atu husu hahusuk ne'ebe maka ne'eba la iha 'resposta' los ida. Ha'u nafatin servisu atu sai "mahusuk" ida ne'ebe diak liu atu uza hahusuk ne'ebe efetivu nu'udar bi'it estratejiku ne'ebe mestre ida iha atu tulun alunu sira aprende. 

Ikus liu, ha'u fiar mestre ida moris atu servi. Mestre ida dedika an tomak ba aprendizajen, ba nia materia/dixiplina, ba nia alunu sira, no atu kria futuru ida ne'ebe diak liu nu'udar fatin ne'ebe posivel ba ema hotua atu moris no hela ba. Hirak ne'e hotu nu'udar dezafiu sira ne'ebe ha'u simu bainhira ha'u hili atu sai mestre ida. Ha'u nafatin ho fuan, neon, no laran tomak hala'o buat hirak ne'e.  

Tradusaun husi versaun orijinal: 

 In ARTICLES, PHILOSOPHY OF TEACHING

My Philosophy of Teaching

 August 27, 2008  Barbara Licklider 

https://www.facultyfocus.com/articles/my-philosophy-of-teaching/

SAIDA MAK HA'U HALO BA HA'U-NIA MORIS?

Buat barak los mak sei hein hela atu deskobre maibé nia kestaun mak ida ne'e iha sentidu no valor ba ida ne'ebé buka ka lae? Moris hanesan  bain-bain iha situasaun ne'ebé totalmente la hanesan bain-bain. Oinsa mak bele ajusta ho moris ida bé la hanesan bain-bain ne'e? Nia konsikuensia, mak bainhira la biban ona atu hasoru hakarak eh lakohi tenki subar an iha maskara nia kotuk. Entaun realidade iha moris ne'e akontese katak la'os buat bain-bain ona ema barak mak labele sai sira-nia an lolos (auténriku). Sira presiza rona ida ne'e, hare ida ne'eba, imita ida ne'e, no la'o tuir modelu ida ne'eba. Ikus mai, sira la sai tiha ona sira-nia an ida ne'ebé *orijinal (inautentiku). Hakfodak liu tan, fenomena refere akontese ba kuaze ema hotu bé moris iha planeta mundu ida ne'e. Nune'e, oinsa ema sira ne'e bele moris? Ezatamente, ema sira ne'e moris duni maibé la hamoris sira-nia moris. Hanesan mate-isin ida ne'ebé halo finji moris hanesan kritura moris ida maibé la iha diferensia ho boneka tau pilla ka robot ida bé kontrola hela husi remotu. Dala ida tan, iha mundu atu moris ba ne'e susar. La'os tanba saúde ladiak ka falta domin ka ekonomia mak dezaraska hela, moris diak, riku eh kiak maibé liu fali buat sira ne'e hotu,  mak sai estranjeiru rasik ba nia an. Durante nia moris, nia taka/uza máskara oin-oin atu halo ema hotu haksolok ho nia finjidu haksolok nian, halo ema hotu-hotu orgullu ho nia finjidu hatudu nia abilidade, halo ema hotu hamanasa ho oin-midar ho nia finjidu oin-midar, no halo ema hotu senti hetan atensaun no kuida ho nia finjidu laran-luak eh tulun-na'in. Buat sira ne'e hotu ita halo ba se los? Tanba sa ita presiza halo ba ema seluk? Tanba servi!? Tanba 'bem comun'/ema hotu nia diak!? Tanba Jesus/Maromak nia gloria!? Tanba manan prémiu iha lalehan!? Tanba hein ema nia hanoin mai ita!? Tanba atu kasu ita-nia sala!?

La hatene to'o bainhira los mak ema moris lahó taka maskara oin-oin ba nia oin. Sai realistiku liu fali fantazia idealistika . Sai onestu ba nia an rasik liu fali bosok ba nia an.  Sai saida mak nia hakarak atu sai liu fali ema seluk nia hakarak nia atu sai. Lahó interven eh interupsaun husi ema seluk ba nia moris. Lahó ema seluk nia hateten 'ó presiza sai ide ne'e eh ida ne'eba mak diak. Presiza imita ida ne'e eh ida ne'eba mak los'. Ikus mai, kria iha ema nia an inautentiku iha ne'ebé mak ema labele tan ona iha abilidade atu deside rasik ba nia an basa hatene mak tuir-tuir sa mak ema seluk dehan ba nia atu la'o tuir. Labele tan ona, hamriik firme ba nia valor no prinsipiu rasik. Labele ona atu define nia an. Ba nia ema seluk nia hare sei defini nia an lolos liu fali  ninia hare ba nia an. Nune'e, nia mentalidade la'os ona atu kria ba moris maibe hein moris ne'e mak kria ba nia. La hetan ona produtividade iha nia an tanba nia rasik sai produtu ida husi produsaun.

Ba ha'u-nia an rasik mos hanesan. To'o bainhira los mak ha'u sai kria-na'in ida? Bainhira los mak ha'u para atu kopia no paste ema seluk nia an ba ha'u-nia an rasik? To'o bainhira los mak ha'u bele hateten 'LAE' ba ema seluk nian no deklara 'LOS' ba ha'u nian? Ha'u la baruk ka tuir-tuir buat bain-bain ne'ebé ema hotu la'o tuir hanesan bain-bain? Saida los mak ha'u halo hodi deklara ha'u-nia ezistensia rasik?

#1 SENTIDU MORIS

APRENDE ATU FO AGRADESE

Kleur ona la update artigu senti hanesan la hasoru maluk doben le-nain sira, iha ne'ebe ha'u saudades tebes ba tinan ida ho balun nia laran. Espera katak ho Maromak nia domin bo'ot, ita hotu bele hetan grasa iha "Fulan Maksoin Kosok Oan Jesus Kristu".

                            

AGRADESE

Dala balun iha ita-nia moris difísil mai ita atu agradese, bainhira susar no terus akontese mai ita. Bainhira, akontese momentu ksolok/kontenti nian, sei fásil liu atu agradese. Maibé, bainhira susar no terus akontese, ita senti hirus maka’as no tau todan ba Maromak.

Agradese la’os deit dehan: “La buat ida,” ka “Sorte! Ida ne’e la akontese mai ha’u.” Agradese ne’e haré liu ba sentimento de gratidão husi fuan no rekoňese katak Maromak mak iha poder liu ita iha planu ne’ebe mak furak liu ne’ebe ita la hatene. Agradese nu’udar manifestasaun ba ita-nia fiar ba Maromak. Agradese hanesan dalan atu haré ba susar, terus, no dezafíu hodi ultrapassa.

Tes. 5:18: “no tanba buat hotu, fo agradese ba Maromak, basá ne’e mak buat ne’ebe Maromak hein husi imi atu halo iha Kristu Jesus.”

“Ema balun lamenta, tanba ai-funan roza iha nia tarak; Ha’u agradese katak tarak iha ai-funan roza.”
–Alphonse Karr, krítikus, jornalista, novelista husi Fransa.

“Senti agradese no la hatete sai ne’e hanesan falun prezenti ida no la fo ba ema ruma.”
–William Arthur Ward, hakerek-nain famozu, inventor The Fountains of Faith

“Senti agradese nu’udar abilidade atu hala’o moris hanesan prezenti ida. Senti agradese liberta ita husi prizaun ba ksolok an rasik.”
– John Ortberg, pastor senior igreja Menlo Park Presbyterian.

“Obrigadu ha’u-nia Maromak doben, ba moris ne’ebe furak ne’e. Perdua ami, basá ami la to’o atu hadomi moris ne’e. Obrigadu ba udan no oportunidade hodi hader iha dadersan. Ha’u fo obrigadu agora, tanba ha’u karik sei la agradese orsida.”
– Garrison Keilor, inventor no komentor ba radio Garrison Keilllor’s Radio Show.

“Ita dala barak la agradese ba buat ne’ebe ita iha ona, maibé ita sempre arepende ba baut ne’ebe ita la atinji.”
–Schopenhauer, filózofu Jerman.

“Maromak haraik grasa fuan nian mai ha’u atu simu buat sira ne’ebe imposível ha’u muda, aten-brani atu muda buat sira ne’ebe ha’u bele muda, no sabedoria atu hatene nia diferensia.”
-Barry spilchuk, inventor A Cup of Chicken Soup for the Soul.

Liafuan Filozófiku Husi Socrates no Aristóteles

                         

SOCRATES

Filózofu husi Gregu 469-399 AC (Antes de Cristo)

“Sabedória úniku lolos mak hatene katak Ita lahatene buat ida”

“Koko uluk, hafoin konta. Komprende uluk, hafoin hatan. Rona uluk, hafoin fo valor. Servisu uluk, hafoin espera”

“Ha’u han atu moris, la’os moris atu han”

“Hatene uluk lai o-nia an”

“Bainhira lakon iha debate, du’un sai meiu ida ba ta’ukten”

“Depois de Socrates katuas ona, Socrates aprende muzika. Tuir mai iha ema ida dehan ba nia, “O la moe ga hodi aprende nafatin iha o-nia tempu be katuas ona?” Nia hatan, “Ha’u senti moe liu fali sai ema ne’ebe beik iha tempu katuas”

“Dalan atu hetan reputasaun ne’ebe diak mak ho servisu/estuda maka’as atu sai saida mak Ita hakarak”

“Moris ne’ebe lahetan koko mak moris ne’ebe la iha valor”

“Husu pergunta mak inisiu husi koňesimentu”

“Ha’u labele hanorin saida deit be se deit. Ha’u so bele halo sira hanoin”

“Siensia hanesan anin. Nia barak tebes iha ita-nia let. O bele hetan nia ne’ebe deit no bainhira deit”

“Mate sai hanesan bensaun ne’ebe diak liu hotu ba ema”

                         

ARISTÓTELES

Filózufu husi Gregu 384-322 AC (Antes de Cristo)

“Orasaun fo forsa ba ema ne’ebe fraku, halo ema la fiar sai fiar no fo aten-brani ba ema ne’ebe tauk”

“Edukasaun iha abut ne’ebe moruk, maibe nia fuan midar”

“Estuda konaba hanoin no siensia koňesimentu, lahó atu hariku fuan hanesan deit la aprende buat ida”

“Esperansa mak mehi ne’ebe real”

“Eduka hanoin lahó eduka fuan ne’e la’os edukasaun lolos”

“Sira ne’ebe hatene halo ba. Sira ne’ebe komprende, hanorin ba”

“Hatene an rasik mak hun husi sabedoria”

“Ha’u-nia kolega diak mak ida ne’ebe reza mai ha’u”

“Ita-nia ksolok depende ba ita-nia an”

“Terus sei sai folin liu bainhira ema ida hasoru dezafiu bo’ot ho ksolok, la’os ho laran-nakraik, maibe ho hanoin bo’ot”

“Iha área/zona ema nia moris, honra no kondekorasun monu ba ema sira ne’ebe hatudu nia altitude diak sira iha ninia hahalok”

“Ema nia asaun hotu akontese bazeia ba impaktu ida ka hitu tuir mai, oportunidade, natureza, obriga, ábitu, razaun, korajen, no deseju/hakarak”

“Susesu mak buat ne’ebe ita halo fila-fila. Ho nune’e, matenek la’os asaun, maibe ábitu”

“Atu sai belun ne’e buat fasil ida, maibe amizade mak ai-fuan ne’ebe fo fuan kleur”

AMAZING GRACE

AMAZING GRACE

Ola! maluk reader sira. Espera katak imi diak deit. Ba kolega estudante pre-finalista sira  Happy Holiday to All!

Moris nee hanesan bisikleta nunee se ita hakarak moris tenki tebe (row) mak foin lao/moris

-Albert Einstein

Laos ho moris deit  maibe moris hodi fo fuan nunee moris nee iha duni valor. 

Diak! ba maluk le nain sira nebe hau hadomi iha Kristu nia naran; Tuir mai ita sei le istoria realidade furak nian ida nebe sai lisaun ida mai ita-nia fiar sarani liu-liu iha Tinan Mizerikordia ida-nee! 

«Feto isin-metan ida nebe ferik ona, ho neneik hamrik iha aula tribunal ida iha Afrika parte Sul. Nia tinan besik 70. Iha nia oin iha riskus terus nian nebe nia hetan tinan-tinan.

Iha oin, iha kadeira suspeitu nian, tur hela Sr. Van der Broek. Nia simu deklarasaun sala nian tanba oho tiha ona ferik nee nia oan no nia laen. Tinan hira liu ba nia mai foti ferik nee nia oan, tiru-mate nia no sunu tiha nia isin.

Tinan tuir mai, Van der Broek mai tan. Nia foti ferik nee nia laen. Durante tinan rua, ferik nee lahatene sa los mak akontese ba nia laen. No tuir mai Van der Broek mai tan no lori ferik nee ba fatin ida besik mota sorin. nia hare nia laen hetan terus boot no kesi hela. Van der Broek nia ema sira obriga nia laen hamriik iha ai-maran nebe tau hamutuk tiha ona no sira fakar gazolina ba nia leten. Liafuan ikus nebe nia rona husi ni laen bainhira sira rega dadaun gazolina ba nia leten mak, “Aman, perdua sira.”

La kleur deit, Sr. Van den Broek hetan kaer no atu tesi-lia todan iha tribunal. Deklara katak nia halo sala, no agora too ona momentu atu simu kastigu todan. Bainhira ferik nee hamrik, juiz husu nia, “Nebe, saida mak Ita hakarak? Saida mak tribunal tenki halo ba ema ida-nee nebe ho violensia brutal nebe nia halo hodi oho tiha ona nia familia?”

Ferik nee hatan, “Hau hakarak buat tolu. Dahuluk, lori hau ba fatin nebe hau-nia laen mate ba no hau sei rekolla hamutuk nia rai-rahun hodi hakoi nia ho diak.”

Depois hein oituan, nia hatutan, “Hau-nia laen no hau-nia oan mak hau nia familia mesak. Tan nee, hau nia pedidu daruak mak hau hakarak Sr. Van den Broek sai hau-nia oan. Hau hakarak nia mai fulan ida dala rua iha ghetto (uman ba ema isi-metan) no loron ida tomak passa tempu ho hau nunee hau bele espresa ba nia domin nebe sei iha hau-nia laran.”

“No, ikus,” nia dehan tan, “ pedidu datoluk, hau hakarak Sr. Van den Broek hatene katak hau fo perdua ba nia tanba Jezus Kristu mate atu fo perdua. Nunee mos ho pedidu ikus hau-nia laen nian. Tan nee, se bele hau husu ema ruma ajuda hau be oin atu nunee hau bele lori Sr. Van den Broek ba iha hau-nia hakuak no hatudu ba nia katak hau perdua lolos ona nia?”

Bainhira staf nee lori ferik nee ba oin, Sr. Van den Broek tokadu tebes ba buat nebe nia foin rona too halo  nia desmaia. Tuir mai, sira nebe iha tribunal laran-kolega, no viziñu, sira nebe sai vitima hanesan ba violensia no injustisa-hamrik no hananu: “Amazing grace, how sweet the sound that saved a wretch like me. I once was lost, but now I’m found. I was blind, but now I see.”»

Bainhira le istória sira hanesan nee, ita dala barak husu ba ita-nia an, “Tanba sa hau fasil atu odiu ema ruma tan deit nia koalia sai liafuan nebe hakanek hau-nia fuan? Tanba sa mak hau difisil liu atu fo perdua be ema enkuantu hau dehan ba hau-nia an katak hau nee maktuir Kristu nian? Tanba sa mak ibun nee sai monok atu koalia deit liafuan perdaun sira no liman nee senti toos atu fo liman ba malu no hakuak ba ema sira nebe haterus/hakanek ita?”

Bainhira konsiente buat nee, meius dahuluk nebe ita bele halo mak ho onestu dehan, 

“ Aman, perdua hau tanba hau la fasil atu perdua ema nebe halo sala mai hau!”

HEWAI AN-DENY ONESELF

                                  HEWAI AN

Ema barak hakarak atu hetan gaba no iha konsiderasaun. Ikus-ikus ita dala barak rona liafuan hanesan, “buat hau deit nee,” nebe hamosu termu ida naran narsis ka narsismu-gaba an deit no buat hotu sempre konaba nia an deit. Alem ida-nee, iha facebook, iha ema nebe hakarak atu eksis-sempre hakarak prezensa iha grupu husi nia kolega nia-sira rede.

Agora nee, kultura narsis no eksis atu sai hanesan ona nesesidade prinsipal, satan ba foinsae sira. Joven sira gosta atu ema tau atensaun ba sira iha sira-nia sorin. Hatais trendy no uza pronunsia mañoza atu nada ema nia atensaun.

Maibe oinseluk ho saida mak Jezus hanorin. Ba Nia apostulu sira Jezus hateten, “Se mak hakarak mai tuir Hau, nia tenki hewai nia an…” (Mat. 16:24). Signifikadu saida dehan hewai an? Ka Ita tenki konsidera ita-nia an hanesan la ezisti no abandona? Ka ida-nee signifika katak ita labele asesu ba rede-sosial iha grupu sira iha facebook? Buat nee mak Jezus nia hakarak ka?

Interesante oituan katak liafuan “hewai an” ho versaun lia-Engles katak “to deny oneself,” nebe tuir nia definisaun katak: fo deklarasaun katak ema ida nia an la iha eksistensia. Ho liafuan seluk, ita-nia eksistensia ka ita-nia an ne eksis ga lae, laos buat nebe importante, no laos buat nebe persiza atu kestiona.

Maibe, atu hewai an laos hewai arbiru deit la ho razaun. Nai Jezus haforsa atu ema se deit nebe hakarak tuir Nia, tuir Nia dalan, nee mak foin nia persiza atu hewai nia an-komprende katak atu buka no halo ita-nia an rasik sai sentru ba ema sira nia atensaun iha ita-nia sorin laos buat nebe prioridade.

Tebes manorin ida-nebe dook husi kultura modernu agora, no dala ruma senti todan no susar atu halao. Sa karik uluk mak sai sentru ba atensaun, agora bainhira tuir Jezus, la sai hanesan tiha ona ema barak nia atensaun.

Tanba sa mak sai hanesan nunee? Tanba Nai Jezus dehan katak nia “la mai husi mundu nee” (Jo. 8:23). No bainhira ita tuir Jezus, nee hatudu Maromak hili tiha ona ita husi mundu nee - “ita laos mundu nian” (Jo. 15:19). Tan nee, se bainhira ita fiar no tuir Nia, dalan nebe ita sei liu la hanesan ho mundu modernu ohin loron ka kultrua trending world.

Maibe nee laos katak la ho konsekuensia, basa hakerek tiha ona katak mundu sei odio ita bainhira ita tuir Maromak (Jo. 15:18, 19). Hewai an, laos atu tuir deit Nia dalan, maibe mos prontu atu terus, prontu atu simu lia-foer, prontu atu la konsidera, la vale no la serve-tan Jezus nia naran.

Tanba sa mak hanesan nee? Bainhira ita laos tan mundu nian, mundu mos la konsidera ita nee parte husi nia. Hodi tuir Jezus no fiel ba Nia hanorin, dala ruma mundu konsidera ita hanesan ema beik, folinlaek, la serve atu fihir no la iha funsaun (1Cor. 1:27, 28). Ba sira nebe kaer metin Nai Jezus nia liafuan, mundu sei dehan sira “halo an sai diak” no “halo an sai santu”; buat sira hanesan nee sei kontinua ba nafatin mai husi mundu. Hakarak atu tuir Nai Jezus? Ida-nee mak dehan katak hewai an.

Maibe, se ita nafatin laran-metin no tahan an, Maromak mak sei konsidera ita. Tebes duni hanesan esperiensia uniku iha Jezus: bainhira ita hewai ita-nia an ba Maromak-“deny oneself,” komprende ho neo katak sentru atensaun laos husi ita-nia an-no bainhira mundu konsidera ita beik no dezesperadu tanba halo ona buat nee; maibe lolos Maromak mak sei konsidera ita no hili ita atu hamoe buat nebe mundu konsidera sentru atensaun (1Cor. 1:27-29).

Persiza nafatin atu narsis, ka? no hakarak eksis? Se ita iha tiha ona rede komunidade sidadaun reinu Maromak nian, soi atu simu kargu hamutuk iha Nia reinu, no too konsidera ita nudar Maromak nia oan ka Ita nafatin  persiza atu sai narsis no eksis iha mundu nebe aat, provizoriu no sei liu lalais ka?